ඔබේ වාස භූමිය විවාහ යෝග යටකරනවාද?

2017-11-30 10:21:00       191
feature-top
විවාහය යනු පුද්ගලයකුගේ නැවත ඉපදීමක්‌ ලෙස සමාජයේ අදහසක්‌ තිඛෙනවා. ජීවිතයේ වැදගත් සන්ධිස්‌ථානයක්‌ ලෙස විවාහය යන්න හඳුන්වා දිය හැකියි. සමාජයේ හා ජාතියේ මෙන්ම මානව වර්ගයාගේ යහපැවැත්ම තීරණය කරන්නා වූ ප්‍රධාන සාධකයක්‌ ලෙස නූතන ශිෂ්ට සමාජය තුළ විවාහය සමාජ ගත වී තිඛෙනවා. නිසි වයසට සපැමිණි සෑම තරුණ තරුණියකගේම සුන්දර බලාපොරොත්තුවක්‌ ලෙස විවාහය හඳුන්වා දිය හැකියි. ඉපැරණි සෘෂි මතයන් පරිදි මිනිසෙකුගේ ජීවන චක්‍රයේ ඉතාමත් වැදගත් ස්‌ථානයක්‌ විවාහයට සහ ගෘහයට ලබා දී තිඛෙනවා. වාස්‌තු ශිල්පය තුළ ගෘහයේ පවතින දෝෂයන් සහ භූමියේ පවතින දෝෂයන් විවාහය සම්බන්ධයෙන් සෘජුවම බලපාන බව පෙන්වා දී තිඛෙනවා. විවාහය කල්යැම හෝ විවාහය අතපසු කරවන විවිධ සාධක අතුරින් වාස්‌තු දෝෂ සහ භූමි දෝෂ ප්‍රබල ස්‌ථානයක පසුවෙනවා. විශේෂයෙන් භූමියේ ප්‍රබල දෝෂ පවතින ඉඩමක සාදන ගෘහයට එම දෝෂයන් බලපාන අතර එම දෝෂ සහිත නිවසේ ජීවත්වන පුද්ගලයන්ට එම දෝෂවල අයහපත් බලපෑම් එල්ල වීම පොදු සිද්ධාන්තයයි. වාස්‌තු ශිල්පයට අනුව භූමියේ දෝෂ පිළිබඳව මූලිකව කරුණු පරීක්‍ෂා කිරීමේ දී පවතින එක්‌ ප්‍රබලම සාධකයක්‌ වන්නේ මධ්‍ය පහත් වූ ඉඩම් හා ත්‍රිකෝණාකාර හැඩතල සහිත ඉඩම් වේ. විවාහය ප්‍රමාදවන සහ කල්යන භූමි දෝෂයන් ලෙස මෙම හැඩතළ සහිත භූමිය ප්‍රබල වී තිඛෙනවා. එසේම භූමියේ පවතින සක්‍රීය ශෛල ඉතා බලවත් වීමද භූමියේ දෝෂ මතු කරන අතර එහි නිවැසියන්ගේ පරම්පරාව යාවත්කාලීන නොවීමට හේතු වෙනවා. පරම්පරාව යාවත්කාලීන නොවීම යනු විවාහය සිදු නොවීමයි. භූමි දෝෂ ලෙසම ගතහැකි වෘක්‍ෂ බලපෑම්ද තවත් ප්‍රබල සාධකයක්‌ වන අතර නිවස ඉදිරිපිට සියඹලා, අඹ, මඩු හා කටු සහිත ශාක නොසිටු විය යුතු බවද පෙන්වා දෙමි.

සෑම විටම උතුරට හා නැගෙනහිරට බෑවුම් සහිත භූමිය ඉතාමත් ඵල සහිත වන අතර උතුරු හෝ නැගෙනහිර දිශාවන් වල ගල් සහිත ඉඩම් ද විවාහ දෝෂ බහුල කරවන භූමි සාධකයන් වේ. එසේම ආපෝ ධාතුව නිරිත දිශාවේ හා ගිණිකොණ දිශාවේ ඇති ඉඩම් වලද ජීව ඵල රහිත බව පෙන්වා දිය හැකි අතර එවැනි ඉඩම් ආශ්‍රිත නිවාස වල වාසය කරන්නන්ගේ විවාහ ප්‍රමාද වීම බහුල වේ.

ඉහත ආකාරයට භූමියේ දෝෂයන් හඳුනා ගන්නා ඔබ තමන්ගේ ගෘහයේ ඇතිවිය හැකි වාස්‌තු දෝෂයන් ද මනාව හඳුනා ගැනීම වටී, ඒ සඳහා ඔබගේ ගෘහය පිළිබඳ පළමුව මනාව අවබෝධ කරගත යුතු වෙනවා. පළමුව නිවසේ පවතින ඒ ඒ දිශාවන් හඳුනා ගන්න. ඊට පසු එම දිශාවන් දුර්වල වී ඇත්දැයි ඔබම සැක හැර දැන ගන්න. දුර්වල වී ඇති දිශාවන් හැකිතාක්‌ සක්‍රීය කර ගන්න, එවිට ඔබගේ නිවස විශ්ව ශක්‌තියට නිරාවරණය කර ගත හැක.

නිවසේ ඊශාන දිශාව හොඳින් හඳුනාගෙන ඊශාන දිශාවේ පහත සඳහන් ගෘහ අංග ස්‌ථානගත කිරීමෙන් වැළකීමට වගබලා ගන්න.

වැසිකිළි, මුළුතැන්ගෙය, ප්‍රධාන නිදන කාමර, ගබඩා කාමර, ගරාජ, සේවක කාමර, පඩිපෙළ, උස්‌ කණු, අපිරිසිදු විය හැකියෑයි සිතන සෑම කටයුත්තක්‌ම ඊශාන දිශාවෙන් ඉවත් කළ යුතුයි. විශේෂයෙන්ම විදුලි මීටරය, ගෘහ යන්ත්‍ර, ඉඩමට ප්‍රවේශ ගේට්‌ටුව, අන්ධ බිත්ති,

ඊශාන දිශාවට යොමු කළ හැකි දේවල් - පූජා පවත්වන ස්‌ථානය, (බුදු මැදුර ආදිය) ළමා කාමර, අධ්‍යාපන කාමර, සාලය, විසිත්ත කාමරය. උර්දු මුඛ ද්වාරය, අභ්‍යන්තර විල්, වැඩි ඉඩකඩක්‌ සහිත විවෘත ස්‌ථාන.

ඉහත ආකාරයටම ඊශාන දිශාව සක්‍රීය කිරීම තුළින් විශ්ව ශක්‌තිය නිවස තුළට සම්ප්‍රේශණය කර ගැනීමේ හැකියාවක්‌ ඇත. එසේම නිවසේ නිරිත දිශාවද හොඳින් හඳුනාගෙන පහත සඳහන් ගෘහ අංග ස්‌ථාන ගත නොකිරීමට වගබලා ගත යුතුයි.

මුළුතැන්ගෙය, ළමා කාමර, ගරාජය, සේවක කාමර, ගබඩා කාමර, අමුත්තන්ගේ කාමර, අභ්‍යන්තර විල්, පොකුණු, වැසිකිළි වල ආදිය නිරිත දිශාවේ නොතිබිය යුතුයි.

නිරිත දිශාව ඉතාමත් සුදුසු වන්නේ ප්‍රධාන නිදන කාමරය යෙදීම සඳහායි. විශේෂයෙන් නිරිත දිශාවේ අභ්‍යන්තර ජලය රැඳවීම සිදු නොකළ යුතු අතර සාලය සහ කෑම කාමරය සඳහා යොදා ගැනීම වරදක්‌ නැත. එහෙත් සෑම විටම ප්‍රධාන නිදන කාමරය නිරිත දිශාවේ යොදා ගැනීමට වග බලා ගත යුතුයි.

විශේෂයෙන් විවාහපත් වීමට අපේක්‍ෂිත දුවාදරුවන් නිරිත දිශාවට ආසන්නයේ ඇති බටහිර හෝ දකුණු දිශා වල ඇති කාමරවලට යොමු කිරීම ඉතාමත් ප්‍රතිඵල සහිත බව පෙන්වා දෙමි. එහෙත් කිසිම විටක ගිණිකොණ හෝ වයඹ දිශාවල ඇති කාමර ඔවුන් සඳහා සුදුසු නොවේ. විවාහ කල් ගතවන සෑම කෙනෙක්‌ම ගිණිකොන, වයඹ වැනි කාමරවල කල්ගෙවන පිරිස ලෙස හඳුනාගෙන ඇත. ළමුන්ගේ අධ්‍යාපනය අවසන් වූ විට ඊශාන දිශාවෙන් ඉවත් කිරීම වඩා යහපත් වන අතර දකුණු, බටහිර, නැගෙනහිර දිශා ඉතා සුදුසු වේ. විවාහ පත් වූ විට නිරිත දිශාවේ කල් ගෙවීමට සැලැස්‌වීම වාසනාවන්ත දරුඵල සඳහා හේතු වේ.

එසේම නිවසේ ද්වාර සටහන සෑම විටම යහපත් විය යුතු අතර නිවසට ඇතුළුවීමේ සහ පිටවීමේ ද්වාර 03 ක්‌ යෙදී තිබිය යුතු අතර දකුණු දිශාවේ ද්වාරය ඉතා වැදගත් වේ. මංගල ද්වාරය අවහිර වන ලෙස කටු සහිත ගස්‌ සහ අඹ වෘක්‍ෂය නොවිය යුතු අතර ද්වාරයේ පියන එළියේ සිට අරින විට දකුණු දිශාවට විවෘත වීම හා දිශාවට ගැලපෙන කැටයමක්‌ යෙදීම මගින්ද නිවසේ වාස්‌තු දෝෂ ඉවත් කරගත හැක.

මීළඟට අවධානය යොමු කළ යුතු විශේෂ වාස්‌තු මූලධර්මයක්‌ වන්නේ බ්‍රහ්ම පාදයයි. විවාහ පමාවන සෑම නිවසකම ප්‍රධාන හේතුවක්‌ ලෙස බ්‍රහ්ම පාදය බිත්තියට යටවී තිබීම විශාල වාස්‌තු දෝෂයක්‌ ලෙස සක්‍රීය වී ඇත. ඔබගේ නිවසේ බ්‍රහ්ම පාදය බිත්තියකට, කණුවකට හෝ බර භාණ්‌ඩ තබා යටකර ඇති දැයි සැකහැර දැනගන්න.

එසේම නිවස සමීපයේ ඇති ශාකයන්ගේ බලපෑම සෘජුවම එල්ල වේ. විශේෂයෙන් නිවස ඉදිරිපිට ඉතා උස්‌ව වැඩුනු පිලල් සහිත අඹ ගස්‌ ඇත්නම් එම නිවසේ විවාහ සිදු නොවීම හා පරම්පරාව නතර වීම සුලභ කාරණයකි.

ඉහතින් දක්‌වන ලද කරුණු වලට අමතර වශයෙන් වාස්‌තු සිද්ධාන්ත වලට අනුකූලව විවාහ කල්යැම හා විවාහ නොවීම සඳහා බල ගැන්වෙන වාස්‌තු දෝෂයක්‌ ලෙස ඡායාරූප වලින් සිදුවන සංඛ්‍යාත හැසිරවීම පෙන්වා දිය හැක. නිවසේ සිටින තරුණ තරුණියන්ගේ කුඩා අවිධිමත් ඡායාරූප සාලයේ එල්ලා තැබීම.

නිවසේ විවාහ කල් යැම සඳහා අපගේ නොදැනුවත්කම නිසාම නිවස තුළ ඇතිකරගනු ලබන වාස්‌තු දෝෂයන් ප්‍රභල වශයෙන් බලපානු ඇත. ඒවා සැකවින් පහතින් දක්‌වා ඇත.
01) ප්‍රධාන ද්වාරය අසල ජලය රැඳවීම. (බටහිර/දකුණ)
02) අශ්ව ලාඩම නිවසේ ප්‍රධාන ද්වාරයේ එල්ලා තැබීම.
03) වැරදි මියුරල් නිවසේ තිබීම.
04) විනාශම් ලකුණ නිවස තුළ තිබීම.
05) රුවල් නැව්.
06) විකෘති මිනිස්‌ රූප.

ඉහතින් ඔබ වෙත පැහැදිළි කරදෙනු ලැබුවේ ඔබගේ විවාහය ප්‍රමාද කරවීම සඳහා බලපානු ලබන වාස්‌තු දෝෂ වලින් බිඳකි. ඔබගේ නිවසේ සහ භූමියේ මෙවැනි ලක්‍ෂණ ඇත්නම් හා ඔබට විවාහයේ ප්‍රශ්නයක්‌ බලපා ඇත්නම් දෝෂ නිවැරැදි කර ගැනීමට උත්සහ ගන්න. විශේෂයෙන් විවාහය අපේක්‍ෂිත කරන තරුණ තරුණියන් තමන්ගේ ගෘහය ඉදිකිරීමට අපේක්‍ෂාවෙන් සිටී නම් ඉහත භූමි දෝෂ සහ වාස්‌තු දෝෂ වළක්‌වාගෙන තමන්ගේ සිහින නිවහන ඉදිකර ගන්න උත්සහ ගත යුතුයි. එවිටයි එම නිවසේ නියම ඵල තමන්ට ලබාගත හැකි වන්නේ. නැත්නම් ඔබ මහන්සි වී ඉදිකරන නිවසට ශ්‍රීයාකාන්තාව හා ඊශාන දෙවියන් නොපැමිණෙනු ඇත. මේ සියල්ල ඔබ වෙත පැහැදිලි කර දෙනු ලැබුවේ ඔබගේ ලෞකික ජීවිතේ යහපත් පරමාරරථ ඉටුකර ගැනීම සඳහා ඔබට අවැසි විශ්වීය දැනුම ලබා දීමටයි. භූමි දෝෂ හා වාස්‌තු දෝෂ නොමැති සම්පත් නිවසක ඔබ සැමට සතුටින් ජීවත් වීමට වාසනාව උදාවේවා.

courtesy : sithmalyaya.com


More News »