මුල්ගල පෑගෙනවානම් නිවසියන්ටත් කරදර

2017-12-26 10:26:00       582
feature-top
ඕනෑම දෙයකට අනන්‍යතාවක්‌ තිබිය යුතුයි. එම අනන්‍යතාව තුලින් එය හඳුනාගැනීමට මෙන්ම සමාජයේ පිළිගැනීමට ලක්‌වීම සිදු වෙනවා. නිදසුනක්‌ ලෙස පුද්ගලයෙකු හදුනා ගැනීමට හා ඔහුගේ අනන්‍යතාව තහවුරු කිරීමට හැඳුනුම්පත් තිබෙනවා. එසේම වාහනයකට එය හඳුනා ගැනීමට අංකයක්‌ තිබෙනවා. පරම්පරා විකාශනයත් සමගම පරම්පරාවන්ගේ අනන්‍යතාවන් බිහිවුණා. මේ ආකාරයට ජීවි හා අජීවී සෑම දෙයකටම හඳුනා ගැනීමේ හා තේරුම් ගැනීමේ විශේෂ ලක්‌ෂණයක්‌ පවතිනවා. නිවසකටත් මෙම තත්ත්වය එලෙසම බලපාන බව සෘෂි උතුමන් දේශනා කොට තිබෙනවා. මේ අනුවයි අතීතයේ රජ මැඳුරු, සිටු මැඳුරු, අමාත්‍ය මන්දිර, සේනාධිපති මැඳුරු ආදී වශයෙන් ගෘහ කර්මයන් වෙන් වෙන් වශයෙන් හඳුනා ගනු ලැබුවේ. ඒ අනුව වාස්‌තු ශිල්පයේ දී ගෘහයක අනන්‍යතාව තහවුරු කරනු ලබන ප්‍රධානතම ගෘහ කොටස කුමක්‌ද යන්න පිළිබඳව ඔබව දැනුවත් කිරීම එහි හොඳ හා නරක ප්‍රතිඵල ප්‍රායෝගිකව කරනු ලබන බලපෑම කුමක්‌ද යන්න පහදා දීම අරමුණ වේ. 
 
 අප පළමුවෙන් ගෘහ කර්මයක්‌ ආරම්භ කිරීමේදී භූමිය මත තබන මුල්ම ඝන වස්‌තුව වන්නේ "මුල් ගල" යි. මෙම මුල් ගල කොතරම් වැදගත්ද යන්න පිළිබඳව වාස්‌තුවේ මනාව පැහැදිළි කොට තිබෙනවා. එහි තරම කොතෙක්‌ද යන්න කිවහොත් එය හඳුන්වනු ලැබුවේ "මඟුල් ගල" යනුවෙනි. අතීතයේ ගෘහ කර්මය සඳහා ප්‍රධාන මඟුල් ගලට අමතරව පරිවාර මඟුල් ගල් කිහිපයක්‌ තබනු ලැබුවේ මෙය සංඛ්‍යාත්මකව 4, 5, 8 ආදී වශයෙන් විය. කෙසේ වුවද භූමි ධාතුව මත ගොඩනැඟෙන පඨවි ධාතුවේ මුල්ම පුරුක වන්නේ මඟුල් ගලයි. එබැවින් ඔබගේ අභිනව නිවසේ තබන මුල්ගල නිසියාකාරව තැබීමටත් දැනට ඔබ පදිංචි නිවසේ තබා ඇති මුල්ගල පිළිබඳව නැවත සිතා බැලීමත් ඉතා වැදගත් බව පෙන්වා දෙමි. 
 
 දැනට ඔබගේ පදිංචි නිවසේ තබා ඇති මුල්ගල පිළිබඳව නිසි ආකාරයෙන් දැනුවත්වීම ඉතාමත් වැදගත්. ඔබ මිලදී ගත් නිවසක්‌ නම් පෙර අයිතිකරුවන්ගෙන් ඒ පිළිබඳව අසා දැනගන්න. කෙසේ වෙතත් මුල් ගල නිශ්චිතව සොයාගත නොහැකිනම් ඔබ කළ යුත්තේ ඔබගේ නිවසේ බ්‍රහ්ම පාදය නිසි ලෙස හඳුනාගෙන එය සක්‍රීය කිරීමයි. විශේෂයෙන් ඔබගේ නිවසේ මුල් ගල කිසිම විටක පෑගීමට නොදිය යුතු දෙයක්‌ බව පෙන්වා දෙමි. නිවසේ යම් යම් වෙනස්‌කම් සිදු කිරීමේදී මුල්ගල නිවසේ පෑගෙන ස්‌ථානයකට ඔබටත් නොදැනුවත්ව ඒමට ඉඩ ඇත. විශේෂයෙන් දොරවල් එකතු කිරීමේදී මෙය සිදුවන අතර එහිදී ඔබගේ නිවසේ ස්‌ථාවරත්වය බිඳී යනු ඇත. 
 
 මුල් ගල පැගීම නිසා ඇතිවන හානි,
 
 1. නිවස සෑදීම ප්‍රමාද වෙයි. 
 
 2. නිවසේ සාමය පලායයි.
 
 3. සතුරු කරදර බහුල වෙයි.
 
 4. ගෘහ හිමියාට රාජ බිය ඇතිවේ.
 
 5. ගෘහ හිමියාගේ සෞඛ්‍ය පිරිහෙයි.
 
 මේ ආකාරයට මුල් ගල පැගීම නිසා නිවැසියන්ට කරදර ඇතිවීම නොවැළැක්‌විය හැකි දෙයකි. ඔබගේ මුල් ගල නිශ්චිතවම පෑගෙන්නේ යෑයි ඔබට හැඟේ නම් එය ගලවා ජලයේ පාකර හැර නැවත සුභ මූහුර්තියෙන් නිසි ස්‌ථානයේ මුල් ගලක්‌ තැබීම සිදු කළ යුතු බව වාස්‌තුවේ සඳහන් වේ. 
 
 මෙවැනි පෑගෙන මුල් ගලක්‌ ගැලවීම හිතු මතේට සිදුකළ නොහැක. ඒ සඳහා සුභ මුහුර්තියක්‌ ලබාගත යුතු අතර නැවත මුල්ගල තැන්පත් කිරීමේදී සුභ මුහුර්තියෙන්ම තැන්පත් කළ යුතු බව පෙන්වා දෙමි. 
 
 නව නිවසට මුල් ගලක්‌ තබන ආකාරය
 
 ඔබගේ නව නිවසට නිසි ලෙස වාස්‌තු සිද්ධාන්ත වලට අනුකූලව මුල් ගලක්‌ තැබීමට ඔබ මුල සිටම වගබලා ගත යුතු වෙනවා. ඉපැරැණි වාස්‌තු සිද්ධානුකූලව සකස්‌කර ගත් මුල්ගල ආගමික ස්‌ථානයකට ගෙනගොස්‌ පිරිත් කළ යුතු වේ. ඉන් පසුව පිරිත් සඡ්Cධායනා මධ්‍යයේ ගෘහ හිමියා විසින් ඊසාන දිශාව බලා නිවසේ ගිණිකොන කොටසේ මුල් ගල තැබීම කළ යුතු වෙනවා. සෑම විටම මුල්ගල පොළවට සමාන්තරව හා අත්තිවාරමේ බිත්තිවලට ලම්භකව තැබීම කළ යුතු වෙනවා. එය හරවා තැබීම නොකළ යුතුය. ඔබගේ ගිණිකොන දිශාවේ වැසිකිළි බිත්තිවලට හසුවන ලෙස මුල්ගල නොතැබීමට වගබලා ගත යුතු වෙනවා. එසේම මුල් ගල නොපෑගෙන ලෙස ස්‌ථානගත කිරීමට සිහි තබා ගත යුතු වෙනවා. ඔබගේ නිවසේ මුල් ගල තබන ස්‌ථානය නිවාස සැලැස්‌මේ සටහන් කොට තැබිය යුතු අතර එය අනාගත වෙනස්‌කම් සිදු කිරීමේදී ඔබට ඉතා වැදගත් වෙනවා. එසේම කිසිම විටක නිවස මධ්‍යයේ මුල් ගල තැබීම සිදු නොකළ යුතු බව පෙන්වා දෙමි. 
 
 මුල් ගලක අඩංගු විය යුතු දෑ
 
 ඉපැරැණි සෘෂිවරුන් පෙන්වා දී ඇති පරිදි ඔබගේ නිවසේ තබන මුල් ගලක පහත සඳහන් ද්‍රව්‍ය අඩංගු විය යුතු බව පෙන්වා දෙමි. 
 
 කස්‌තුරි. නවරත්න, ගොරෝචන, පස්‌ලෝ, හිරිගල්, සුදු හඳුන්, රත් හඳුන්, උඳු, මුං, තල, වී, මෑ, අගිල්, ගුගුල්, තුවරලා, සැවැන්න මුල්, ඊතන, එල අබ, රත්මල් කැකුළු, සමන්පිච්ච කැකුළු, මානෙල් , නෙළුම්, ඕලු, නාමල්, රුක්‌අත්තන මල් රේණු, කපු ඇට, වැල්මි, කුඹුරු ඇට, වෙනිවැල් ගැට, කොහොඹ අරටු, මී ඇට, මූදු වැලි, ගඟේ වැලි, ඇළේ වැලි, දොළේ වැලි, පර්වත පස්‌, ඇතා බිඳි පස්‌, සමුද්‍ර පර්වත මැටි, මූදු වතුර, ගඟේ වතුර, වෙළේ වතුර, ඇළේ වතුර, දොළේ වතුර, ඔයේ වතුර, පොකුණු වතුර, වැහි වතුර, කොහොඹ තෙල්, මී තෙල්, ගිතෙල්, තැඹිලි තෙල්, අබ තෙල්, කැකුළු හාල්, කපුරු, එනසාල්, අංජන කැට, රන්, රිදී, මුතු, මැණික්‌ ආදියයි.
 
 ඔබ විශේෂයෙන් මතක තබාගත යුතු දෙයක්‌ තිබේ. ඔබගේ නිවසේ මුල් ගල තැබීමට ප්‍රථම බහිරව දේවතා පූජාවක්‌ පවත්වා භූමි ඥාතීන්ගෙන් අවසර ලබාගත යුතු වෙනවා. මෙහිදී ගම්භාර දෙවියන්ගේ උදව් උපකාර ඇතිව බුදු ගුණ ස-Cධායනා පවත්වා මෙම බහිරව දේවතා පූජාව පැවැත්වීමට වගබලා ගන්න. කිසිම විටක පුළුටු වර්ග එක්‌ නොකළ යුතු වේ. 
 
 එමෙන්ම ඔබගේ අභිනව නිවසට මුල්ගල තැබීමට ප්‍රථම අවස්‌ථා දෙකකදී භූමිය හා සම්බන්ධව ගනුදෙනු කිරීම සිදු වෙනවා. එනම් 
 
 Õ කූඤ්ඤ හා ලණු ඇදීම
 
 Õ පස්‌ කැපීම
 
 එබැවින් නිවසට මුල්ගල තැබීම සඳහා සුභ මුහුර්තීන් තුනක්‌ ලබා ගැනීම කළ යුතුම වෙනවා. පළමු කූඤ්ඤය ගසන අවස්‌ථාවේදී ඔබ භූමිය හා මූලිකවම සම්බන්ධ වන අතර ඒ සඳහා බෙලි ගසක ලීයක්‌ යොදා ගැනීම සහ ලී මිටියක්‌ යොදා ගැනීම ඉතා වැදගත්. එසේම ලණු ඇදීම යනු විශ්වය හා තම මතය ප්‍රකාශ කිරීමේ මූලිකම අවස්‌ථාව වන බැවින් ඒ සඳහා කොහු ලණු භාවිතය වැදගත් වේ. ඉන් පසුව දෙවන අවස්‌ථාවේදී මුල්ගල තැබීම සඳහා අවශ්‍ය අත්තිවාරම සකස්‌ කර ගැනීම සඳහා සුභ මූහුර්තියෙන් මංගල පස්‌ පිඬැල්ල කැපීම සිදු කළ යුතු අතර එයද ඊසාන දිශාව බලා සිදු කිරීම මැනවි. මේ සෑම කටයුත්තක්‌ම දක්‌ෂිණාවෘතව සිදුකිරීමට වගබලා ගත යුතු වේ. 
 
 ගෘහ ආරම්භක වාස්‌තු පූජාව
 
 ඔබගේ නිවසේ ගෘහ ආරම්භක වාස්‌තු පූජාව මුල් ගල තබන දිනයේදීම සිදු කළ යුතුයි. මේ සඳහා ඔබ විසින් කපන ලද මංගල පස්‌ පිඩැල්ල රතු හෝ සුදු (විවාහක නම් රතු/අවිවාහක නම් සුදු) රෙදි කඩකට ගෙන එහි ගැට තුනක්‌ ගසා ගලායන ජලයට දමා භූමියේ සියලු දෝෂ දුරුවේවා යෑයි ප්‍රාර්ථනා කිරීම සිදු කළ යුතු වේ. මෙය ගෘහ ආරම්භක වාස්‌තු පූජාවක්‌ ලෙස පෙන්වා දිය හැක. 
 
 මේ ආකාරයට ඔබගේ අභිනව නිවස සඳහා නිසි ආකාරයෙන් මුල්ගල තබා වාස්‌තු ශිල්පීය ක්‍රමවලට අනුකූලව නිවසේ කටයුතු ආරම්භ කිරීමට ඔබත් උනන්දු විය යුතුයි. එවිට නිවසේ කටයුතු නිසියාකාරයෙන් නිමකර ගැනීමට ඔබට වාසනාව උදාවේ. එසේම ඔබගේ දැනට පදිංචි නිවසේ මුල්ගල පිළිබඳව අවධානය යොමු කරන්න. එය නිසි ස්‌ථානයේ තිබේ දැයි සැකහැර දැන ගන්න. එය ඔබගේ නිවසේ වාස්‌තු එකඟ කර ගැනීමට තබන මුල් පියවර ලෙස සිතන්න. මුල්ගල වරද්දා ගත් සෑම තැනකම වාස්‌තු දෝෂ හටගෙන තිබෙනවා. ඒ නිසා නිවසේ ගෘහ හිමියාට වැඩි බලපෑමක්‌ එල්ල කරන, මඟුල් ගල, ගැන සැක හැර දැනගැනීම ඔබේ යහපත පිණිස හේතු වේ. සැමට සම්පත් නිවසක්‌ ලබා ගැනීමට වාසනාව උදාවේ. 


උපුටා ගැනීම දිවයින පුවත් පත ඇසුරෙනි

More News »