නිවෙසක වාස්තු දෝෂ හඳුනා ගනිමු

2019-01-17 10:24:00       468
feature-top
නිවෙසක පවතින වාස්තු දෝෂ ගැන තරමක් වෙනස් ආකාරයටයි අද ලිපියෙන් ඔබව දැනුවත් කරන්න බලාපොරොත්තු වෙන්නේ. මෙම නිවෙස සාදා තිබුණේ රූප සටහනේ පෙනෙන ආකාරයටයි.

නිවාස තට්ටු දෙකකට සැලසුම් කළත් පළමු අදියර ලෙසට ස්ලැබ් එක දමා පහළ කොටසේ වැඩ කටයුතු සෑහෙන දුරකට සම්පූර්ණ කර ඔවුන් එහි පදිංචි වී තිබුණා. කරගත යුතුව පවතින ඉතිරි වැඩ කටයුතු කිරීමට උවමනාව තිබුණත් නිතරම බාධා වීමයි සිදුවුණේ. පදිංචි වීමෙන් පසුව නිවැසියන්ටත් නිතරම අසනීප සිදුවුණේ බලාපොරොත්තු නො වුණු විදිහට. අසනීප වී පිළියම් කරනවාට වඩා එසේ වීමට කලින් යම් පිළියමක් කිරීමට හැකි නම් එය දහස් වර වටිනා දෙයක්. “වාස්තු” කටයුතුවල දී ත් මුලදී ම එම කරුණු කාරණා නිවැරැදි ලෙස පිළිපැදීමයි වටින්නේ. අපි බලමු මොනවාද මේ නිවෙසේ තිබූ දෝෂ කියලා.

 

01). ප්‍රධාන දොර

මේ නිවෙසේ ප්‍රධාන දොර උතුරු දිශාවටයි සවිකර තිබුණේ. ද්වාර සටහනට අනුව උතුර, නැගෙනහිර හා බස්නාහිර යන දිශාවන් පමණක් නිවෙසින් පිටත සීමාවේ සවි කිරීම සුදුසු නැහැ. “අක්‍රාන්ද” නම් වූ මේ ආකාරය නිසා ගෙහිමියන්ට ශෝකය ඇතිවෙන කරුණු යෙදීමට හැකි බව සඳහන්. නිවෙසේ ප්‍රධාන දොර තිබූ ස්ථානයත් දෝෂ ගෙනෙන තැනක්. ඊට ඉදිරියෙන් වූ ගේට්ටුවත් වාස්තුවල දී ගැළපෙන්නේ නැහැ. දැනට නිවෙස ඉදිකර ඇති ආකාරයට අනුව වඩාත් ප්‍රායෝගිකව වෙනස්කම් කළ හැකි ආකාරය සොයාබලා වැරැදි නිවැරැදි කිරීම වඩාත් සුදුසුයි. සාමාන්‍යයෙන් දකුණට දොරටුවක් දමා “විජය” හෝ උතුරු දිශාවේ ඇති දොරටුව ඉවත් කර “කාන්ත” වර්ගයේ නිවෙසක් කිරීමයි යෝග්‍ය වේ.

 

02). මායිමට සම්බන්ධය

නිවෙස මායිම් දෙකකටම සාදා ඇති බව ඔබට පෙනෙයි. නැගෙනහිර දිශාව යම් දුරකට ආවරණය වී පවතියි. මේ ආකාරයෙන් නිවෙසේ මායිම්වලට කිට්ටුවෙන් පවතින ප්‍රේත පාදය හා සම්බන්ධ වන පරිදි නිවෙස සෑදීම නුසුදුසු දෙයක් වුණත්, කුඩා ඉඩම් සැලකීමේ දී “ප්‍රේත පාදයේ” දොස් නොවන ආකාරයට අනෙක් වාස්තු කරුණු සම්බන්ධ කර ගත යුතුයි. එවිට ප්‍රේත පාදය තුළ ඔබට දොස් ගෙනදෙන්නේ නැහැ.

03). බ්‍රහ්ම පාදය පීඩාවීම

රුපයේ ඔබට පෙනෙනවා ඇති නිවෙස මැදින් පිහිටන පිහිටි බ්‍රහ්ම පාදය. නිවෙසක බ්‍රහ්ම පාදය කියන්නේ අතිශය වැදගත් පුජනීය ප්‍රදේශයකට. මෙම ස්ථානය කිසිම දෙයකින්, ආකාරයකින් පීඩාවට පත් කිරීම නිවැසියන්ට විපාක අත්කර දෙන කාරණයක්. බ්‍රහ්ම පාදය තුළ ඇති පඩිපෙළ, බිත්ති හා කොන්ක්‍රීට් කනුව, කාමරයේ දොර සියල්ලම දෝෂ සහිතයි. පඩිපෙළ ඇතුළතින් පිහිටි ගබඩා ස්ථානයත් ඇත්තේ නිවෙසේ මධ්‍යයට වෙන්නයි.මේවා කිසිම විටෙකත් නිවෙසේ මධ්‍යයට නො ගත යුතු දේවල්. ආර්ථික පසුබෑමක් සමඟ නිවෙසේ වැඩ කටයුතු අඩාල විමත්, නොසිතූ ගැටලු මතුවීම හා නිවැසියන් රෝගී කරවීම පිණිස කරුණු ඇතිවීම මෙමඟින් සිදු විය හැකි දෙයක්.

උපුටා ගැනීම දිවයින පුවත් පත ඇසුරෙනි

More News »