කෝණ මාසවල ගෙවල් සෑදීම නොකළ යුතුයි

2019-03-18 12:37:00       893
feature-top
වාස්‌තු ශිල්පය යනු ස්‌වභාව ධර්මයට එකඟව, විශ්ව ශක්‌තීන්ගේ දෝලනයට පටහැනි නොවන ලෙස භූමිය මත සිදු කරනු ලබන නිර්මාණ ක්‍රියාවලියන් පිළිබඳව අවශ්‍ය භෞතික සහ පාර භෞතික දැනුම සපයන සුවිශේෂී විෂයක්‌ ලෙස ඉතාමත් කෙටියෙන් හඳුන්වා දිය හැකියි. නූතන නිවාස සැලසුම්කරණයේ දී බොහෝ අය විශේෂ අවධානයක්‌ යොමු කරනු ලබන්නේ භෞතික පැතිකඩ සඳහා පමණි. එය නිවැරැදි ක්‍රමය නොවන බව මතක තබාගත යුතුයි. නිවසක්‌ ඉදිකිරීමේ දී භෞතික පැතිකඩට අමතර වශයෙන් ඒ හා බැඳුණු ආධ්‍යාත්මික පැතිකඩත් ප්‍රබලව ක්‍රියාත්මක වන බව හඳුනාගත යුතුයි. මෙම ආධ්‍යාත්මික පැතිකඩ පිළිබඳව අවධානය යොමු කිරීමේ දී වාස්‌තු විද්‍යාව තුළ හමුවන සංකල්ප රාශියක්‌ පවතිනවා. ඒවා අතර වාස්‌තු පුරුෂය, බ්‍රහ්ම පාදය, විශ්ව ශක්‌තිය, සුභ සහ අසුභ පාද, සුභ අසුභ දිශා, බහිරව පූජා, භූමි ඥාතීන්, කෝණ මාස සහ වාස්‌තු මර්මස්‌ථාන ආදී ලෙස සංකල්ප රාශියක්‌ සඳහන් වෙනවා. මේවා පිළිබඳව නූතන ජනයා අතර පවතින දැනුමේ අල්ප භාවය නිසාම නොසලකා හැර තිබීම ඉතාම කනගාටුදායක තත්ත්වයක්‌ ලෙස පෙන්වා දිය හැකියි.

වාස්‌තු ශිල්පය තුළ හමුවන මෙවැනි පාර භෞතික සංකල්ප පිළිබඳව ගැඹුරින් අධ්‍යයනය කිරීමේ දී පෙනී යන්නේ මේ සෑම සංකල්පයකම විද්‍යාත්මක සත්‍යයන් පිළිබිඹු වන බව සහ ඉතාමත් තර්කානුකූලව ඒවා නූතන විද්‍යාව සමග සැසඳිය හැකි බවයි. පෙර විසූ අපගේ මුතුන් මිත්තන් මෙම වාස්‌තු සංකල්පය පිළිබඳව විශ්වාස කොට ඒවා ඇදහූ අතර ඒවායේ විපුල ප්‍රයෝජන ලබා ගන්නා ලදී. එසේ වුවද ව්‍යාජ කාර්මීකරණය හා තක්‍ෂණ දියුණුව හමුවේ බිහිවී තිබෙන භෞතිකවාදී සංකල්ප නිසා මිනිසා හැම දෙයක්‌ම භෞතික අන්තයෙන් සිතීම තුළ අතරමං වී ඇති බව පෙනී යනවා.

එසේ වුවද ආධ්‍යාත්මික බලය භෞතික බලයට වඩා සිය දහස්‌ ගුණයකින් වැඩි බව සිහි තබාගත යුතුයි. මේ ගැන ඔබට පුංචි නිදසුනක්‌ පෙන්වනවා නම්, ඔබට කොපමණ මිල මුදල් හා භෞතික සම්පත් තිබුණත් ඔබගේ ගෘහයේ වාස්‌තු දෝෂ බලවත් නම්, ඔබගේ මානසික ආතතිය සහ මානසික පීඩනය ඉහළ යැම තුළ සතුට ඔබගේ නිවසින් පලා යනු ඇත. එය ඔබට භෞතික දේවල් තුළින් ඉටුකර ගැනීමට හැකියාවක්‌ නැහැ. ඔබගේ රෝග පීඩා ඉස්‌මතු වීම, පවුලේ සමගිය පළුඳු වීම, සතුරන් ඇතිවීම වැනි දේද ආධ්‍යාත්මික සංකල්ප තුළ මතුවන්නා පාර භෞතික පැතිකඩක්‌ බව මතක තබා ගන්න.

පෙර විසූ රිෂි උතුමන් මිනිසාට තේරුම්ගත නොහැකි ගැඹුරු සිද්ධාන්ත ඔවුනට සරලව තේරුම් කර දීම සඳහා විවිධ සංකේත සහ සංකල්ප මගින් ඉදිරිපත් කළා. වාස්‌තු පුරුෂ සංකල්පද එවැන්නක්‌ බව මතක තබා ගන්න. විශ්ව ශක්‌තීන් දෝලන න්‍යාය පැහැදිලි කරදීම සඳහා වාස්‌තු පුරුෂ සංකල්පය යොදාගත් බව මනාව ඔප්පු වෙනවා. එසේම භූමියේ පාද බෙදීම තුළද ඇත්තේ එවැනිම විද්‍යාත්මක සිද්ධාන්ත සමූහයකි. භූමිය මත ඇතිවන්නා වූ ධන හා Rණ තරංගවල රටාව භූමියේ පාද සටහන තුළින් ඉදිරිපත් කර තිබෙනවා. එසේම කෝණ මාස වශයෙන් ඉදිකිරීම් නොකළ යුතු කාල පරාසයක්‌ පෙන්වා දී තිබෙනවා. එය වර්ෂයකට කෝණ තුනක්‌ ලෙස දක්‌වා තිබෙනවා. එහිදී සිදු වන්නේ පෘථිවියේ භ්‍රමණය හා පරිභ්‍රමණය තුළ සිදුවන විචලනයන් නිසා ඇති වන්නා වූ විශේෂ තත්ත්වයන් පිළිබඳව හඳුන්වා දීමට සහ පෘථිවිය තුළ චුම්භක ශක්‌තිය ප්‍රබල කාලයක්‌ වන මෙම කෝණ මාස තුළදී කරනු ලබන ඉදිකිරීම්වල විවිධ අඩුපාඩු සහ ඉරි තැලීම් හා ගිලා බැසීමට තිබෙන අවදානම අවම කර ගැනීම සඳහායි.

ඉහතින් පෙන්වා දුන් පරිදි වාස්‌තු ශිල්පය යනු සුවිශේෂී විෂය ධාරාවක්‌ වන අතර ජ්‍යෙතිෂ්‍ය විද්‍යාව යනු වාස්‌තු විද්‍යාව නොවන බවද මතක තබාගත යුතුයි. වාස්‌තු ශිල්පය තුළදී ජ්‍යෙdතිෂ්‍ය සංකල්පය යොදා ගැනීම පමණක්‌ සිදු කරන අතර වාස්‌තු ශිල්පය යනු වෙනම විෂයකි. මෙය වරද්දා ගෙන තිබෙන බව ප්‍රායෝගිකව අත්දැකීම් තුළින් මනාව පෙනී ගොස්‌ තිබෙනවා.

නූතනයේ නිවාස සැලැස්‌මක වාස්‌තු පරීක්‍ෂා කිරීම සඳහා බොහෝ අය සොයා යන්නේ ජ්‍යෙතිෂ්‍යවේදියා ළඟටයි. එය හරියට ලෙඩකට බෙහෙත් ගැනීමට දොස්‌තර ළඟට යනවා වෙනුවට කොන්දොස්‌තර ළඟට යනවා වගේ වැඩක්‌. නිවාස සැලැස්‌මක නැකත් බැලීම යනු වාස්‌තු බැලීම් නොවන බව ඔබ මනාව අවබෝධ කර ගන්න. නිවසක්‌ ඉදිකිරීමට අවශ්‍ය සුභ මුහුර්තාදිය ලබා ගැනීමට ජ්‍යෙතිෂ්‍යවේදියා ළඟට යැම සුදුසු වන අතර වාස්‌තු බලා ගැනීමට වාස්‌තු ශිල්පියෙකු ළඟට යා යුතු වේ. වාස්‌තු ශිල්පියා සතුව සුවිශේෂි හැකියාවන් භෞතික වශයෙන් සහ ආධ්‍යාත්මික වශයෙන් තිබිය යුතුයි. ගෘහ නිර්මාණ ශිල්පියා සහ වාස්‌තු ශිල්පයා වෙනස්‌ වන්නේ එබැවිනි. වාස්‌තු ශිල්පියා සතුව ජ්‍යෙතිෂ්‍ය දැනුම, ගෘහ නිර්මාණ සහ තක්‍ෂණ දැනුම වාස්‌තු ශිල්පීය දැනුම සහ වාස්‌තු මනෝවිද්‍යාත්මක දැනුම මෙන්ම ආධ්‍යාත්මික පරිචයක්‌ ද පැවතිය යුතුයි. එම නිසා වාස්‌තු ශිල්පය නිසියාකාරයෙන් හඳුනාගෙන ඔබගේ ගෘහයේ විශ්ව ශක්‌තිය නිසි ලෙස එකඟ කර ගැනීමට ලෝ වාසීන්ට ප්‍රඥාව ලැබේවා යෑයි මෙත් සිතින් පතමු.


More News »